الرئيسية / أخبار / بعد أزمة “الفلوس”.. تامر حسني يعاتب أحمد السقا.. والأخير يعتذر

بعد أزمة “الفلوس”.. تامر حسني يعاتب أحمد السقا.. والأخير يعتذر

عاتب الفنان المصري تامر حسني صديقه الفنان أحمد السقا، وذلك بعدما تحدث الأخير عن خلاف وقع بينهما بسبب فيلم “الفلوس”، خلال استضافته في برنامج “السيرة”.

السقا قال: “بعد ما عملت لتامر حسني مشهد ضيف شرف في فيلم “الفلوس” فوجئت إن الفيلم نزل إنه بطولة تامر وأحمد السقا وصورة معاه على الأفيش، كلمته قولتله إيه اللي بيحصل ده يا تامر، مرة قالي دول فانز، ومرة قال دول الشركة المنتجة، قولتله أنا معرفش حد منهم أنا معرفش غيرك، ودي أثرت عليا جدا نفسيا وعليا في شغلي”.

تامر رد على كلام السقا، بقوله: “حبيبي وأخويا وصديق العمر ونجم الدنيا كلها أحمد السقا، كنت أتمنى انك تكلمني بيني وبينك، ولو كنت زعلان من أي حاجة أو فاهم أي حاجة غلط، لأن الحجات دي لا يمكن تفوتك، وأنا كنت أتمنى مكتبش الكلام دا هنا، بس عشان بعد كلامك في التلفزيون، الجمهور الكريم بقى ليه حق إنه يفهم الصح”.

وتابع: “عشان أفكرك بس، أنت كلمتني وقلت لي فيه خبر في موقع، وعليه صورة افتراضية للفيلم، وكاتبين أنك بطل في الفيلم، وأنا رديت عليك ان دي اجتهادات صحفية والصورة من تصميم محبين اللي اكيد فرحوا بالخبر اننا مع بعض”.

وأضاف: “حتى أنا مقولتش ان دي الشركة المنتجة، لأنها شركة كبيرة، ولا يمكن تعمل كدا، لأن الفيلم متباع للخارج والداخل باسم أخوك تامر حسني، نزل والناس كلها شافته، وأنت مش فيه ولا فيه اسمك، كل الأبطال طالعين مرسومين، ومعرفش زعلك من إيه الحقيقة، كان ممكن تزعل لو الكلام دا نزل على صفحتي أو صفحة الشركة المنتجة”.

واختتم كلامه بقوله: “أنا شرحتلك دا من سنة واتكلمنا بعدها، مرة عيدت عليك في عيد ميلادك والتانية بخصوص برنامجك، ولو كنت لسه زعلان كنت هتقولي ساعتها، الفيلم بقاله سنة يا أحمد.. أنت حبيبي يا أحمد وصديق عمر، عشان كدا أنا اللي مش هزعل منك، معلش طولت في الكلام، لأن برضوا زعلك يعز عليا”.

السقا اعترف بخطأه بحديثه عن هذا الخلاف على الهواء، ووجه اعتذارا لتامر، قائلا: “رسالة إلى صديق عزيز.. صديقى وأخى العزيز تامر حسنى.. أنت عارف اللى بينى وبينك عيش وملح وحاجات كتير، قد أكون أخطأت إنى اتكلمت في الموضوع ع الهوا ولكن يعلم الله كم كنت مجروحا وكم كنت حزينا”.

وأضاف: “مش هطول عليك أكتر من كده ولو أنا زعلت شوية وأنت شوية نبقى خالصين يا عم.. تامر حسنى إحنا اللى بينا كتير متزعلش يا عم وحقك عليّ.. وميعادنا الحفلة اللى جاية.. أحمد السقا”.

تامر رد على اعتذار السقا، بقوله: “حبيبي يا صاحبي حصل خير أنا عمري ما ازعل منك ولا أشك لحظة في جدعنتك مع الناس كلها جايز كان في النص بينا ولاد حلال كتير”.

وأضاف: “أنت السقا حبيب قلبي وكدا الجمهور هيستنانا الحفلة الجاية بجد وقال سخن صوتك واستعد للدويتو القادم يا أغلى وأنضف الناس”.

شاهد أيضاً

«سك العملة» تُشارك بجناح متميز في معرض القاهرة الدولي للكتاب

تُشارك مصلحة «الخزانة العامة وسك العملة»، برعاية الدكتور محمد معيط وزير المالية، في معرض القاهرة …