الرئيسية / أخبار / 10 وصايا من ماري منيب تخلصك من الذباب تماما

10 وصايا من ماري منيب تخلصك من الذباب تماما

قدمت الفنانة الراحلة ماري منيب، أشهر حماة في السينما المصرية، 10 وصايا لكل ست بيت، للتخلص من “الذباب”.

ماري منيب قالت: “من واجب الست الاهتمام بمكافحة الذباب لأنه بينقل كل الأمراض المستعصية.. وبلاش أمراض.. بقى الدبانة تقف اسم لله على مقامكم على الحاجة الوحشة كلام في سركم، وبعدين تيجي على حد تاني!! يا ساتر!!”.

وأضافت: “لازم أراعي بيتي بنظري إن كنت ست غنية، وأراعيه بإيدي إن كنت ست متوسطة، وبكده أضمن صحتي، وصحة جوزي وأولادي”.

وتابعت: :”وفيه عشرة وصايا، لو قدرتي تنفذيهم تضمني أنك حافظت على بيتك، وتكوني في الوقت نفسه اشتركت في حملة مكافحة الذباب”.

والوصايا العشر لماري منيب هي:-

1- حطي على الشباك ستاير سلك بين الخشب والزجاج، والشباك الواحد ما يكلفكيش أكثر من خمسين قرش، ويعيش معك العمر.

2- فيه حاجة اسمها فليت لتنظيف البيت من الذباب، والصفيحة كلها بـ18 قرش، وتقعد عندك شهر.

3- الزبالة موش لازم تتواجد في البيت مطلقا، لازم يكون عندك زبالة بغطاء محكم بستين أوسبعين قرش، تعيش معاكي سنتين ثلاثة.

4- لازم تكوني نظيفة في بيتك مش العيال ياكلوا البرتقال، ويرموا القشر على الأرض، وييجي الطير يعف عليه.

5- اقفلي الشبابيك واتركي جزء صغير منها مفتوح، وهشي الدبان فيهرب في الحال، لأنه ما بيحبش الضلمة.

6- متسيبيش اللحمة والخضار جنب الشبابيك المفتوحة، علشان ميعفش عليها الدبان، وكذلك ما تهويش الحلويات في جو مكشوف إلا إذا كنت عاملة احتياطاتك.

7- إذا كان عندك كلاب أو قطط، تنضفيها وتحميها أول بأول، موش تسيبي الطير يعف عليها، وعلى فلذات كبدك اللي بيلعبوا معاها.

8- وكله كوم والمجاري العمومية كوم، لو انسدت عندك بلاعة لازم تصليحها في الحال، وتلاحظي دورة المياه باستمرار، أو تنظفيها بنفسك إذا لزم الأمر.

9- وما تسمحيش للأولاد أبدا أنهم يشتروا جيلاتي أو دندرمة من العربيات اللي بتدور في الشارع، لأنها مليانة أمراض وميكروبات والدبان دايما حاطط عليها.

10- إذا كان في طريق بيتك بعد كده مستنقعات أو خرايب أو مقالب زبالة، بلغي الصحة أو الجهات المختصة في الحال، علشان تساهمي في حملة مكافحة الذباب، وتحفظي بلادك من هذا الوباء.

شاهد أيضاً

«سك العملة» تُشارك بجناح متميز في معرض القاهرة الدولي للكتاب

تُشارك مصلحة «الخزانة العامة وسك العملة»، برعاية الدكتور محمد معيط وزير المالية، في معرض القاهرة …