استضافت الفنانة والإعلامية إسعاد يونس النجم يحيى الفخرانى فى حلقة خاصة من برنامج “صاحبة السعادة” المذاع على فضائية DMC، وكشف الفخرانى أن المخرجين والمنتجين فى مرحلة ما لم يرشحوه للسينما.

وقال الفخرانى: “بعد فيلم المتشردان مكانوش عايزين يجيبونى فى السينما لحد ما وافقت على سهرة تليفزيونية بعنوان الرهان، لما قريت الورق قلت لازم أشارك فيها”.

وأضاف الفخرانى أن مكانته تجاريا تغيرت بعد فيلم “خرج ولم يعد” أولى بطولاته المطلقة، وقص كواليس تصوير مشهد الفار فى الفيلم، قائلا: “كنت المفروض أنام فوق الفرن، ومحمد خان قال لى: الفار هيمشى من قدام وشى، أنا ما بحبش الفيران، وشديت معاه ورفضت المشهد، ووقتها الفيران فى بنها كلت كل المحاصيل، والدولة تخلصت من الفيران، لكن محمد خان طلّع 5 جنيه من جيبه واشترى فارين”.

وتابع: “مدير التصوير طارق التلمسانى قال لى: هربط الفار بخيط عشان ميجيش على وشك وعبال ما بدأنا التصوير كان الفار مات.. قلت الحمد لله”.

من ناحية أخرى، أوضح الفخرانى: “بعض الفنانين رفضوا العمل معى فى خرج ولم يعد، ومن بينهم عادل أدهم لأننى لم أكن نجمًا بالحسابات التسويقية، لكن لما شاف الفيلم قال: ده فيلم حلو بقى”.

واستكمل: “خرج ولم يعد” أول فيلم مصري يحصل على جائزة فى مهرجان قرطاج، وخلال سفرى لتونس عانيت من مغص كلوى شديد واعتذرت عن الحضور، ذهبت للمستشفى ركبولى تحاليل ونزلت الحصوة كلمتهم فى قرطاج قالوا لى: تعالى بكرة، ومكنش على بالى إنى هاخد جايزة.

وأضاف الفخرانى: “مكنوش عايزين يمنحونى الجائزة عشان كان فيه ناس أهم مني، لكن مخرج أجنبي فى اللجنة أصر، ومحدش فرح لى رحت لفريد شوقي قلت له أنت زعلان قال لى: لا يا حبيبي ألف مبروك.. وكلهم قالوا لى دى جائزة لمصر”.

و كشف النجم يحيى الفخرانى، خلال لقائه الفنانة والإعلامية إسعاد يونس فى برنامجها “صاحبة السعادة”: “كنت مرشحا للعار بدلا من محمود عبد العزيز وأنا اللى رشحته، محمود أبو زيد وعلى عبد الخالق قرأوا السيناريو فى البيت عندى ومقالوش أنا هعمل دور إيه، حبيت دور وكيل النيابة “حسين فهمى”، لكن قالوا لى هتعمل الدكتور فاعتذرت ورشحت محمود عبد العزيز.

ووجهت النجمة ليلى علوى رسالة إلى النجم يحيى الفخرانى، خلال اللقاء، قائلة: “أول عمل يجمعنى بالدكتور يحيى الفخرانى مسرحية (بكالريوس فى حكم الشعوب) واتعلمت منه حاجات كتيرة جدا، وبعد كدة بقينا أصحاب .

وأضافت: “فيلم خرج ولم يعد نقلة ليا فى السينما، وفخورة بيه جدا ، وهو واحد من أفضل 100 فيلم مصري، وعايزة أقول ليحيى الفخرانى: “ربنا يديلك الصحة يا يحيى واستفدت منك فى حياتى الشخصية والفنية، وأنت عارف أنا بحبك قد إيه”.

و كشف النجم يحيى الفخرانى كواليس التحضير لفيلم الكيف مع النجم الراحل محمود عبد العزيز، والكاتب محمود أبو زيد والمخرج على عبد الخالق، خلال الجزء الثانى من لقائه قى برنامج “صاحبة السعادة” مع النجمة إسعاد يونس.

وقال يحيى الفخرانى إنه بعد فيلم “خرج ولم يعد” ذاع صيته، وعرض عليه مؤلف فيلم “الكيف” السيناريو وقال له “اختار الدور اللى أنت عايزه”، وعلق: “محمود أبو زيد وعلى عبد الخالق قالوا لى أنت ومحمود أبطال، واختار الدور اللى أنت عايزه، كنت بحب محمود هو إنسان طيب، قلت له تحب تعمل إيه يا محمود، قال لى: أنت تحب إيه، قولتله الصح إنى أعمل الدكتور وأنت تعمل الحلانج”.

وعن إفيه مشهد العزاء الشهير “جاى أهرج”، قال: “دي جملة مش مكتوبة وطلعت كدة وقلت للأستاذ على عبد الخالق عايز أعمله مرة واحدة، بعد المشهد المخرج قال لى: أنت بتشرب حشيش؟ قلت له لأ”.

وعن مشاهده المفضلة فى الفيلم، قال الفخرانى: “أنا بحب كل مشاهدي مع محمود عبد العزيز جدا، وبهتم يكون قدامي ممثل تقيل عشان العمل جماعى”.

وأوضح الفخرانى أنه عايش تجارب المدمنين فى عدد من المستشفيات، مضيفا: “رحت لفيت لفة كبيرة جدا عشان أعرف إحساس المدمنين، وشفت ناس بعينى”.

وتابع: “لما جيت أصور الشوت أستاذ على عبد الخالق، قلت له هعمل المشهد من غير مكياج ومرة واحدة، سعيد الشيمي إيده اتهزت أثناء التصوير وطلب منى الإعادة، حاولت أصوره تانى معرفتش، وجيت تانى يوم صورته”.

كما كشف النجم يحيى الفخرانى محتوى آخر مكالمة جمعته بالنجم الراحل محمود عبد العزيز قبل وفاته، وذلك خلال الجزء الثانى من حلقة “صاحبة السعادة” مع النجمة إسعاد يونس المذاع علىDMC .

وقال يحيى الفخرانى: “محمود عبد العزيز كان زي الطفل، كلمته وفاكر آخر كلمة له، قال لى: أنا موجوع جدا، قلت له: معلش استحمل هتبقى كويس، قال لى: مش عايز أبقى كويس عايز أموت وارتاح”.

وتابع الفخرانى: “ضربت محمود عبد العزيز حبيبى قلم بجد فى إعدام ميت، قلت له معلش استحمل عشان مايبقاش (فيك) خلصت المشهد وقعدت أعيط وأبوس وأحضن فيه”.

وعن مشاهده المفضلة فى فيلم “الكيف”، قال الفخرانى: “أنا بحب كل مشاهدي مع محمود عبد العزيز جدا، وبهتم يكون قدامي ممثل تقيل عشان العمل الفني جماعى”.